“Gemco Jewelry Co.LTD” компанияси Президенти Тошкентда 1 млн. долларга «ухлатилди»

Корея Республикасининг “Gemco Jewelry Co.LTD” компанияси Президенти П.С. Ўзбекистон Республикаси ҳуқуқни муҳофаза қилувчи органларга мурожаат қилиб, ўзига нисбатан фирибгарлик жинояти содир этилгани ҳамда ўта кўп миқдорда моддий зарарга учрагани ҳақидаги Ариза билан мурожаат қилган.

“7news.uz” нашрининг ишончли манбаси хабарига кўра, хорижлик тадбиркор Ўзбекистон фуқароси А.П.нинг қимматбаҳо металлар савдоси билан шуғулланувчи Ўзбек-Корея қўшма корхонасини ташкил этиб, арзон нархда ўзбек олтинидан Кореяга етказиб беришни ваъда қилган ва бунинг эвазига 2.5 миллион (икки миллион беш минг) АҚШ доллари талаб қилган.

Хорижлик тадбиркор эса 37 ёшли тошкентлик А.П.га ишониб 1 миллион (бир миллион) АҚШ долларини берган.

Лекин, А.П. берган ваъдасини шу вақтга қадар бажармаган ҳамда кореялик П.С.нинг қўнғироқларига жавоб бермасдан уни “алдаб” келган.

Ҳуқуқни муҳофаза қилувчи органлар томонидан ўтказилган дастлабки суриштирув натижасида ҳолат қисман ўз тасдиғини топган ҳамда А.П. қўлга олинган.

Гарчи Бош Прокуратура бу ҳақда расман ахборот бермаган бўлса-да, “7news.uz”нинг ишончли манбаси хабарига кўра, ҳолат юзасидан Ўзбекистон Республикаси Жиноят Кодексининг 168-моддаси 4-қисми билан жиноят иши қўзғатилган бўлиб, А.П. эҳтиёт чорачи сифатида қамоққа олинган.